Призыв на гору Господню. — Пророчество Богоотца Давида. — Заря Божества. — Свидетели Преображения: от земли — избранные апостолы, с неба — небошественник Илия, от мертвых — Боговидец Моисей. — Слава Божества Христова. — Свет от Света, просвещающий мир
«Востаните, ленивии, иже всегда низу поникшии в землю, души моея помыслы, возмитеся и возвыситеся на высоту Божественного восхождения; притецем к Петру и к (сынам) Зеведеовым, и вкупе со онеми Фаворскую гору достигнем, да видим с ними славу Бога нашего, глас оке услышим, иже свыше (они) слышаша, и проповедаша (Христа) Отчее Сияние. Величай, душе моя, на Фаворе преобразившагося Господа!»
Христово преображение предусрящем, светло торжествующе предпразднственная, вернии, и возопиим: приспе день Божественнаго веселия — восходит на гору Фаворскую Владыка, Божества Своего облистати красоту.
Приидите, взыдем на гору Господню и в дом Бога нашего, и узрим славу преображения Его, славу яко Единороднаго от Отца: светом приимем Свет, и возвышени бывше Духом, Троицу единосущную воспоим во веки.
Твоего Единороднаго Сына плотское к человеком пришествие провидя духом Богоотец Давид, издалеча (за много веков) к веселию созывает тварь и пророчески взывает: Фавор и Ермон о имени Твоем возрадуются…
Христу радующеся верно последуем: се бо идет к горе, ученики лучшия с Собою ведый, перед нимиже неприступною добротою возсияв паче солнца, показа славу Свою.
Человек зримый, но Бог крыемый, Христос на Фавор восходит, Божества зарю обнажая, еже паче солнца светлостьми славы.
Небо создавый, и звездам свет вложивый, днесь на гору Фаворскую возшед, освещает ученики зарею Божества Своего.
Столпом огнезрачным и облаком древле в пустыни Израиля ведый, днесь на горе Фаворстей неизреченно во свете Христос просия.
Поят Христос Петра, Иакова и Иоанна на гору высоку едины, и преобразися перед ними: и просветися лице Его яко солнце, ризы же Его быша белы яко свет, и явишася Моисей и Илиа с Ним глаголюще, и облак светел осени их, и се глас из облака глаголющ: Сей есть Сын Мой возлюбленный, о Немже благово-лих: Того послушайте.
Таинство показа Христос учеником на Фаворе, просияв паче зари лицем, одеждею же риз Своих убелився светло яко снег, одеваяйся светом яко ризою…
На горе высоце преображься Спас, верховныя имея ученики, преславно облистал есть, показуя, яко (что и сами они) высотою добродетелей облиставше, и Божественней славе сподобятся; глаголющия со Христом Моисей и Илиа показоваху, яко живыми и мертвыми обладает, и иже древле законом и пророки глаголавый есть Бог.
Се Спас — вопияху Моисей и Илиа учеником, на горе святей Фаворстей оглашаемым — Христос, Егоже древле провозвестихом сущаго Бога.
Владычествуяй тварию всею виден бысть зрак раба прием, имже Божества неприступное сияние учеником показал есть, как вмещаху зрети.
Радуется троица Божественных апостол, яже виде по существу Единаго Троицы на горе Фаворстей.
Ныне неуслышанная (неслыханное) услышана быша: без Отца бо Сын от Девы Отеческим гласом славно свидетельствуется, яко Бог и человек, Тойже во веки.
Ныне видена быша апостолом невидимая — Божество во плоти, на горе Фаворстей облиставшее.
Да облистает небо доле (на земле) свет паче солнца, и земля да слышит глаголы живаго Бога, сыновство преображаемаго (Христа) Отец бо свидетельствует на горе Фаворстей.
Поя Давид Твое преображение, предвозгласи глаголя: кто уподобится Тебе, Господи, в сынех Божиих? Ты бо, прославляяся в советех святых, велик явился еси сущим окрест Тебе, страшен во славе Божественнаго зрака.
Прежде креста Твоего, Господи, Тебе преобразующуся, от Отца же свидетельствуему, тамо бы Петр со Иаковом и Иоанном, яко хотяху быти (им предстояло быть) с Тобою и во время предания Твоего, да видевше чудеса Твоя, не устрашатся страданий Твоих…
Прежде креста Твоего, Господи, поим ученики на гору высоку, преобразился еси перед ними, лучею силы озаряя их, отсюду убо (с одной стороны) человеколюбием, отонуду (с другой) властию, показати хотя воскресения светлость.
Прообразуя воскресение Твое, Христе Боже, поят три Тво
я ученики, Петра, Иакова и Иоанна, на Фавор возшел еси: Тебе же, Спасе, преобразующуся, Фаворская гора светом покрывашеся; ученицы Твои, Слове, повергоша себе долу на земли, не терпяще зрети невидимаго зрака; Ангели служаху страхом и трепетом; небеса убояшася, земля вострепета, видящи на земли славы Господа.
Яко небом владеющему, и землею господствующему, и преисподними область (власть) имущему, предсташа Ти, Христе, от земли убо апостоли, яко с небесе же Фесвитянин Илиа, Моисей же от мертвых.
Соглаголюще предстояху раболепно Тебе, Владыце Христу, к нимже (древле) парою (в дыме) огня и мрака и тонким хладом беседовал еси.
Закона и пророков Тя, Христе, Творца и Исполнителя свидетельствоваша, зряще во облаце Моисей Боговидец и Илиа огнеколесничник и неопальный небошественник в преображении Твоем…
Гора, яже иногда мрачна и дымна, ныне же честна и свята есть, на нейже нозе Твои стоясте, Господи, превечное бо сокровенное таинство напоследок явленно сотвори — страшное Твое преображение — Петру и Иоанну и Иакову, иже такова сияния лица Твоего и светлости риз Твоих не терпяще, ниц на лице земли покрывахуся, и ужасом одержими дивляхуся, видяще Моисея и Илию, глаголющих с Тобою, хотящая приключитися Тебе; и глас от Отца свидетельствоваше глаголя: Сей есть Сын Мой возлюбленный, о Немже благоволих: Того послушайте…
На горе преобразился еси, и как вмещаху ученицы Твои, славу Твою, Христе Боже, видеша; да егда Тя узрят распинаема, страдание убо уразумеют вольное, мирови же проповедят, яко Ты еси воистинну Отчее Сияние.
Петру, Иакову и Иоанну, лучшим учеником Твоим, Господи, днесь показал еси на горе Фаворстей славу Божественнаго Твоего зрака, видяху бо ризы Твоя облиставшия яко свет, и лице Твое паче солнца. Не терпяще зрети нестерпимаго Твоего сияния, на землю ниспадаху, никакоже зрети могуще, глас же слышаху свидетельствующ свыше: Сей есть Сын Мой возлюбленный, пришедый в мир спасти человека.
Божества Твоего, Спасе, малу зарю обнажив совозшедшим с Тобою на гору, премирныя Твоея славы сотворил еси рачители (любители): темже ужасно (в изумлении) зовяху: добро есть нам зде быти.
Днесь показал еси Твое Божество, Господи, честным апостолом Твоим, Моисею и Илии, яко Бог закона и благодати сый. с ними же Твое Человеколюбное смотрение (промышление) славим, Иисусе всесильне, Спасе душ наших.
Величаем Тя, Живодавче Христе, и почитаем пречистыя плоти Твоея преславное преображение.
Свете неизменный, Слове, Света Отца нерожденна, в явленнем свете Твоем, днесь на Фаворе свет видехом Отца, свет и Духа, светом наставляющаго всю тварь.
Света Податель, и Свет сый неприступен, Присносущне, Пребезначальне, одеяйся светом как ризою, свет в мир просиял еси с плотию пришед, и свет на горе облистаеши, славы Отчия показав образ.
О слово Божие, Мудросте и Сила и образ Отечь! О Боже, разумеваемый верными и человеки познаваемый! Твоего преображения совершити светлое торжество нас сподоби во свете добрых дел сияющих.
Преобразился еси на горе, Христе Боже, показавый учеником Твоим славу Твою, как можаху. Да возсияет и нам грешным свет Твой присносущный, молитвами Богородицы, Светодавче, слава Тебе!
Кто не удивится, Всецарю славы, великолепию славы Твоея, в неже преображься, показал еси другом Твоим, Божественными светлостьми облистая их?..
Иже на горе Фаворстей преобразивыйся во славе, Христе Боже, и показавый учеником Твоим славу Твоего Божества, озари и нас светом Твоего познания, и настави на стезю заповедей Твоих, озари светом неприступныя Твоея славы и достойны покажи наследники бесконечнаго Царствия Твоего, яко един Благ и Человеколюбец».