Призыв к торжеству. — Светлая радость праздника. — Собрание апостолов. -Удивление Ангелов. — Благоговейные мысли и чувства у гроба Богоматери. -Гроб — лествица. — Гроб — рай.
«Огради моя помышления, Христе мой, ибо Стену мира воспети дерзаю — Чистую Матерь Твою; на столпе глагол укрепи мя, и в тяжких мыслех заступи мя: Ты бо взывающим и просящим верою моления исполнявши; Ты мне убо даруй язык молитвенный и помысл непостыден: всякое бо даяние сияния от Тебе низпосылается, Светоподателю, во утробу вселивыйся приснодевственную!»
Отверзу уста моя, и наполнятся Духа, и слово отрыгну (изреку) Царице Матери, и явлюся светло торжествуя, и воспою радуяся Тоя успение.
Величай, душе моя, от земли на небо честное преставление Божия Матере!
Священных (священнослужителей) сословие, царие же и князи, с девическими чинми, ныне предварите; вси людие стецытеся, песнь надгробную возсылающе купно: ибо всеми Владычествующая хощет наутрие душу предати в руце Сыну, преставляема к вечней обители.
Невеста Божия, Царица Дева, избранным Слава, Хвала девам — к Сыну преселяется.
Яже небес высшая сущи, и Херувим славнейшая, и всея твари честнейшая, яже, премногия ради чистоты, Присносущаго Существа приятелище бывши, в Сыновни руце днесь всесвятую предает душу, и с Нею исполняются всяческая радости, и нам дарует велию милость.
Аще и Непостижный Сея Плод, Имже небеса быша, погребение прият волею, яко мертв: како погребения отвержется неискусобрачно Рождшая?
Апостоли, соберитеся — погребсти тело единыя Богоневесты и Матере Господни. Радуйся ныне Гефсимание град весь, и надгробная пойте на небеса Возлетевшей, со Ангелы Ликующей в бесконечней славе.
Подобаше самовидцем Слова и слугам — и еже по плоти Матере Его успение видети, конечное (последнее) елико на Ней таинство; яко да не токмо еже от земли Спасово восхождение узрят, но и Рождшия Его преставлению свидетельствуют. Темже отвсюду божественною силою собравшеся, Сиона достигоша, и на небо Идущую предсылаху, высшую Херувим.
Облаки носими, Богогласнии от всея земли вземлеми, приидоша в Сион апостоли — видети славное Матере Господни и святое воистинну успение, и светозарны глаголы принести, и чудно погребение соделати Сей, яко рождшей Господа, и верным всем прибежище и покров державен.
Последоваху Божественному Ковчегу священному все множество богословов в Сионе, зовуще глаголы: камо идеши ныне, Скиние Бога живаго? Не престай призирающи верою поющия…
Дивляхуся Ангельския Силы, в Сионе смотряюще своего Владыку, женскую душу руками Носящаго: пречисто бо Рождшей сынолепно (по-сыновнему) провозглашаше: гряди, Чистая, с Сыном и Богом прославлена буди!
Ангели, успение Пречистая видевше, удивишася, како Дева восходит от земли на небо!
Небеснии лицы веселятся и уготовляются прияти Божию чистую Матерь, Царицу, всеми тварьми благочестно господствующую.
Да уклонятся воздушнии дуси, да отступит же самый миродержец, да падет посрамлен, видя возношаему Божию Матерь.
Суд постиже руце досадительныя дерзаго, нанес усечение, Богу сохраншу, славою Божества, честь одушевленному Кивоту, в немже Слово плоть бысть.
Вси земнороднии, стецемся усердно, со бесплотными, погребсти Рождшую Творца твари.
Со Ангелы тецем, со Архангелы и Властьми, и Началы и Престолы, и Силами в Сион, великое чудо узрим.
Богомудрии соберитеся людие: Божия бо Славы Селение от Сиона преставляется к небесному жилищу, идеже глас чист празднующих, глас несказаннаго радования и в веселии вопиющих Христу: препрославленный отцев и наш Боже, благословен еси!
Приидите, мысленно предварим Гефсиманию честную и святый дом славнаго телесе Матере Бога нашего; со апостолы благоухаемся, и со Ангелы песнословим: едина бо бысть радость днесь сущим на земли и на небеси во успении Ея.
Приидите, вернии, приступим ко гробу Божия Матере, и обымем сердцы и устнами, очесы и лицем чисто прикасающеся, и почерпающе исцелений независтныя (неоскудевающия) дары от Источника приснотекущаго.
Видяще лежащу и простерту, очи смежащу, живоподательный Божественный и присный Источник, приидите, верными сердцы слезы то
чаще, прикоснемся Сея нетленному телеси.
Воспойте, людие, Матери Бога нашего, воспойте: днесь бо предает всесветлую душу Свою в пречистыя длани, иже из Нея Воплощшагося без Семене, Егоже и молит непрестанно даровати вселенней мир и велию милость.
О дивное чудо: Источник Жизни во гробе полагается, и лествица к небеси гроб бывает! Веселися, Гефсимание, Богородичен святый доме! Возопиим, вернии, Гавриила имуще чиноначальника: Благодатная, радуйся, с Тобою Господь, подаяй мирови Тобою велию милость!
Чудо преужасно: яже во утробе Невместимаго Царя Носившая — во гробе полагается, и Ангельстии собори со страхом погребают Тоя Богоприятное и честное тело и сие возвысив на небеса возведе Иисус, Сын Ея и Спас душ наших.
В молитвах неусыпающую Богородицу и в предстательствах непреложное упование гроб и умерщвление не удержаста: как бо Живота Матерь к животу престави (Христос), во утробу вселивыйся приснодевственную.
Приидите, празднолюбных собор, приидите и лик составим, приидите венчаим песньми церковь, упокоением Ковчега Божия: днесь бо небо простирает недра, приемля Рождшую всеми Невместимаго; и земля, источник жизни, отдающи благословение, украшается благолепием; Ангели лик составляют со апостолы, ужасно (в изумлении) взирающе от живота в живот преставляему Рождшую Начальника жизни. Вси поклонимся Ей, молящеся: сроднаго присвоения не забуди, Владычице, верно празднующих всесвятое Твое успение.
Приидите, всемирное успение всенепорочныя Богородицы празднуем: днесь бо Ангели торжествуют честное преставление Божия Матере и к веселию нас земных призывают вопити немолчным гласом: радуйся, преставлыпаяся от земли и к небесным оби-телем пресельшаяся; радуйся, яже ученический лик облаком легким во едино собравшая; радуйся, упование и спасение наше; Тя бо христианский род непрестанно ублажает.
Приидите, воспоим, людие, пресвятую Деву чистую, из Неяже неизреченно пройде воплощься Слово Отчее, — зовуще и глаголюще: благословенна Ты в женах! блаженное чрево, вместившее Христа! Того святым рукам душу предавши, моглися, Пречистая, спастися душам нашим.
Приидите, вси концы земнии, честное преставление Богоматере восхвалим: в руце бо Сына душу непорочную положи: темже святым успением Ея мир оживотворився, во псалмах и пениих и песнех духовных, со бесплотными и апостолы, празднует светло.
О выше ума чудес Приснодевы же и Богоматере: во гроб бо вселынися, показа рай: емуже (гробу) предстояще, днесь радующеся поем.
Да празднует тварь молебно: всех Царица к царству мысленному прейде, сцарствовати Царствующему всею тварию, — Еяже ради разрушися адово царство, и мы от земли вознесохомся и со Ангелы жити сподобихомся.
Да возгласят трубы богословов днесь; язык же многовещанный человеческий ныне да восхвалит, да огласит же воздух, безмерным сияя светом; Ангели да поют Пречистая Девы успение.
Да вострубят трубою духовною горы небесныя, да радуются холми… Царица к Сыну преставляется, с Ним царствующи.
Всесвященное преставление Божественныя Твоея и нетленныя Матере совокупи премирныя чины Вышних Сил веселитися с сущими на земли, Тебе поющими: Боже, благословен еси!